У нашых улюбёных спевакоў ёсць свае ўпадабаныя артысты, а нашыя самыя чытаныя пісьменнікі маюць сваіх улюбёных аўтараў. Тое самае можна сказаць пра тэатральных акцёраў, кінарэжысёраў, мастакоў. Для тых, каму цікава даведацца пра фаварытаў вядомых беларускіх творцаў у самых розных відах мастацтва, першы незалежны спадарожнікавы канал "Белсат" запусціў новую праграму – "Прыватная калекцыя".
Яна выходзіць раз на два тыдні. У кожным выданні гледачы могуць завітаць у госці да знакамітых ды папулярных постацяў культурнага жыцця Беларусі.
Падчас гутарак у кватэрах (або ў майстэрнях і студыях) творчых асобаў аўтарка і вядоўца "Прыватнай калекцыі" Вольга Гардзейчык-Мазярская распытвае іх пра музыку, кніжкі ды фільмы, якія даюць натхненне.
Вольга, дарэчы, грае на гітары і спявае песні на вершы Максіма Багдановіча, Уладзіміра Караткевіча і Анатося Сыса.
Без ўвагі не застануцца і важныя ды памятныя хатнія рэчы, пачынаючы з фотаздымкаў. Але пераважна гаворка пойдзе пра духоўнае, у прыватнасці пра тое, што ў герояў праграмы стаіць на паліцах з кніжкамі і дыскамі, паведамляе прэс-служба "Белсату".
Будуць паказаныя фрагменты ўлюбёных фільмаў герояў, прагучаць урыўкі ўлюбёных песень і вершаў. Можа, нават і ў іхнім выкананні.
Пасля гутаркі з творцам гледачоў чакае афіша: анонс канцэртаў, выставаў, тэатральных прэм’ераў на бліжэйшы час. Дарэчы, разлічаная яна будзе на розныя густы.
– Мы палічылі, што не варта арыентавацца на нейкага ўяўнага ідэальнага слухача-гледача, будзем арыентавацца на розныя пакаленні, – зазначае Вольга Гардзейчык-Мазярская.
Вольга Гардзейчык-Мазярская, фота Budzma.org
Пачатак новай праграме "Белсату" паклала сустрэча з лідэрам гурта "Тройца" Іванам Кірчуком.
Са словаў Кірчука вынікае, што самы слуханы ім музыка – Чэслаў Немэн: "Ён заўсёды прагрэсаваў, не было праграмаў, падобных адна да адной… Немэн заснаваў свой музычны свет, у якім жыў і працаваў. І працаваў выдатна".
Дарэчы, лідэр "Тройцы" лічыць, што на Немэна паўплывала тое, што ён нарадзіўся пад Лідаю: "А ў Лідзе ж быў першы рок-клуб у Беларусі ды першая тэледыскатэка, шмат музычных навінак з’яўляліся найперш менавіта тут".
Іван Кірчук прызнаўся, што ў дзень народзінаў і смерці Чэслава Немэна ён запальвае свечку – і цэлы дзень гучыць музыка нашага земляка, вядомага польскага артыста.
Лідэр "Тройцы" распавёў, што таксама шмат слухае духоўнай музыкі, падабаецца яму Сэзар’я Эвура: "Я люблю яе за прастату. Яна мае незвычайную аўру як музыка высокага палёту. І яна няёмка пачуваецца на вялікіх канцэртах. Сэзар’я некалі спявала ў партовых кабачках, яна бачыла людзей, бачыла іхныя вочы. І калі ёсць такі кантакт, то яна іншая".
Цікава, што Іван Кірчук не трымае ў хаце ніводнага музычнага інструмента: апошняю вынес на студыю гітару. Бо пакуль яна была, усё граў ды граў...
У наступным выданні раскрылася "Прыватная калекцыя" Алега Хаменкі, які, паводле вядоўцы, мае самую багатую калекцыю беларускай музыкі або прынамсі набліжаецца да гэтага.
З бальшынёю тых, з кім збіраецца пагутарыць Вольга ў межах праграмы, яна знаёмая асабіста:
– Я ганаруся гэтым сяброўствам. І не таму, што гэта знаныя людзі. А таму, што творчыя і цікавыя. Яны шмат ведаюць і ўмеюць, але шмат ўсё адно шукаюць і спрабуюць. Ад іх падсілкоўваешся.
Акцэнт будзе рабіцца на выяўленні духоўных густаў:
– Пакажам гледачам, што той або іншы вядомы творца чытае, глядзіць, слухае. У асабістым жыцці корпацца не будзем. У гэтых людзей і ў гэтых людзях ёсць шмат куды больш цікавага, чымся інфармацыя пра колер іхных шкарпэтак.
Сярод герояў праграмы захаваецца гендэрны баланс, а таксама прадстаўленыя будуць і беларускамоўныя, і расейскамоўныя творцы. І абавязкова – з розных відаў мастацтва, у тым ліку і вядомыя ў вузкіх колах:
– Напрыклад, фотамастакі – яны ж не могуць быць надта, шырока вядомыя.
Ці здзівілі аўтарку тыя творцы-знаёмцы, з кім выданні ўжо запісаныя? Яна адказвае на гэтае пытанне станоўча:
– Бо мы ж з сябрамі не часта вось так садзімся і не размаўляем падрабязна пра тую самую літаратуру. Нечаканым можа быць і такое прызнанне: мне падабаецца гэтая спявачка, бо падобная да маёй дачушкі.
Тым больш прыватная калекцыя густаў будзе цікавая людзям, хто асабіста не знаёмы з нашымі творцамі.
Трэцяя частка "Прыватнай калекцыі" ў наступны панядзелак, 1 сакавіка, будзе з "князёўнай" беларускага року – Русяй.
У будучыні гледачы "Белсату" даведаюцца пра тое, што змяшчаюць паліцы і шуфляды Лявона Вольскага, Мікалая Пінігіна ды Валянціна Акудовіча.
Комментарии