Скандальна вядомы сваімі выказваннямі пра Абаму дэпутат Сейма Польшчы Артур Горскі заяўляе, што адной з мэтаў зносу гістарычных будынкаў у Гродне з’яўляецца знішчэнне слядоў Польшчы ў гэтым горадзе. Выселеных з “Новага Свету” палякаў не будзе куды засяліць, непакоіцца сябар “ПіС”.
У інтэрв’ю выданню Nash Dziennik дэпутат Сейма, сябар “Права і Справядлівасці” Артур Горскі ўзяўся за ратаванне Гродна ад разбурэння. Даволі нечакана, калі ўлічваць, што кампанія супраць руйнавання гарадзенскай даўніны распачалася ў горадзе яшчэ са тры гады таму. Але тады Горскі ўсе сілы, гледзячы па ягоным персанальным сайце, аддаваў барацьбе за правы палякаў у Літве.
Вось што кажа Артур Горскі ў інтэрв’ю кансерватыўнай каталіцкай газеце, якую ён, дарэчы, узначальваў у 1998 годзе:
- Меркаваныя маштабы разбурэнняў велізарныя, страшэнныя. Гэта сведчыць аб адсутнасці догляду беларускіх уладаў за сваёй спадчынай. Гэта таксама прыклад свайго роду варварства, якое сведчыць пра тое, што саветызацыя ў гэтай краіне пусціла вельмі глыбокія карані. Давайце памятаць, што для зносу будынкаў павінны быць выселеныя іх жыхары, у тым ліку шмат палякаў. Што адбудзецца з імі, ці вернуцца яны ў новыя будынкі? Ці ў стане беларускія ўлады ўкласці такія вялікія інвестыцыі? Баюся, што беларусы лёгка знішчаць 200 будынкаў, а на іх месцы паставяць толькі некалькі новых. Пазней праграма зойдзе ў тупік па фінансавых прычынах.
Горскі выказвае здагадку, што рашэнне наконт зносу гістарычных будынкаў “мае другое дно, звязанае з палякамі”.
- Маецца шмат іншых доказаў таго, што ўлады Літвы, Беларусі і Украіны планава і сістэматычна сціраюць у архітэктуры сляды польскасці. Мы таксама ведаем, што будынкі, якія з’яўляюцца не толькі сведчаннем дачынення Гродна ў мінулым да Польшчы, але таксама і хараством горада, могуць знікнуць назаўсёды. А гэта не толькі польская спадчына, а наша агульная, польска-беларуская.
Нагадаем, што жыхары-абаронцы гістарычнай Гародні ўсё ж лічуць сапраўднымі прычынамі дзеянняў чынавенства звычайныя меркантыльныя інтарэсы: цэнтр горада вабіць інвестараў (хутчэй за ўсё расейскіх), а дзе вялікія інвестыцыі – там і добрыя адкаты. Здаецца, Горскі перагінае ў “польскім” пытанні, якое, канешне ж, існуе ў цяперашняй Беларусі, але не на архітэктурна-гістарычным узроўні. Бо, па логіцы дэпутата, хваля руйнавання павінна была прайсці апошнімі гадамі праз усю Заходнюю Беларусь - ад Браслава да Брэста.
Сябар “ПіС” укалоў і польскі ўрад за тое, што недастаткова клапоціцца “пра польскую спадчыну на Крэсах”.
- Польшча клапоціцца ў абмежаваных маштабах пра нашую спадчыну на Крэсах. Асабліва імкнемся аднаўляць і шанаваць месцы пакутаў і клапоцімся аб польскіх пахаваннях. Акрамя таго, дапамагаем аднавіць некаторыя гістарычныя помнікі, асабліва тыя, што працягваюць служыць палякам, якія жывуць на гэтых землях. Гэта праўда, што інвестыцыі не з'яўляецца здавальняючымі, і мы павінны зрабіць усё, каб яны значна выраслі ў бліжэйшыя гады. Бо калі слядоў польскай нацыянальнасці, якія ўсё яшчэ існуюць, мы не ўратуем сёння, то заўтра ўжо не будзе чаго ратаваць. У выпадку гэтых будынкаў маштаб занадта вялікі, каб польская дзяржава ўзяла на сябе фінансавае іх уратаванне. Але наша дыпламатычная служба павінна зацікавіцца гэтай справай, а ўрад прапанаваць беларускім уладам разам падумаць над гэтым і, па меншай меры, уратаваць найбольш каштоўныя аб'екты.
Найбольшую вядомасць Артур Горскі прыдбаў пасля грандыёзнага скандалу, справакаванага ягонымі выказваннямі з нагоды абрання прэзідэнтам ЗША Барака Абамы. За выказванні Горскага пра “чорнага крыпта-камуніста”, “наіўнага чалавека, чыё абранне павінна ўзрадаваць “Аль-Каіду” і “канец белай цывілізацыі” прыйшлося адказваць прэзідэнту Польшчы Леху Качыньскаму. Паводле ягоных словаў, заўвагі Артура Горскага былі “дзіўнымі, непрымальнымі ды расісцкімі”. “Гэтыя выказванні вельмі дзіўныя і характэрныя для гэтага дэпутата. Зразумела, што ні я, ні большасць сябраў маёй партыі не падзяляюць такія меркаванні”, - заявіў пасля амерыканскіх выбараў Качыньскі.
У 2006 годзе Горскі з паплечнікамі падаў у Сейм Польшчы законапраект, які аб’яўляў Ісуса Хрыста каралём краіны. Каталіцкія біскупы Польшчы параілі дэпутатам-вернікам займацца палітыкай, а не лезці ў рэлігійныя пытанні.
Цяпер вось Артур Горскі заклапоціўся выгнаннем гарадзенскіх палякаў з хат на халодныя вуліцы.
Дамініка БРУНЕЦКАЯ, "МЫ"
Комментарии