Франак Вячорка і Жнівеньскі путч

З Моладзі БНФ выключаныя Вячорка, Крэчка і Анісімаў.

Паседжанне Рады Моладзі БНФ, дзе разглядалася пытанне аб выключэнні, адбылося ўвечары 19 жніўня.

- Прыходжу я дадому, уключаю кампутар, а там ліст, - піша ў сваім LJ Франак Вячорка. - Выпіска з пратаколу пасяджэньня Рады Моладзі БНФ. Во, думаю, даўно Рада не зьбіралася, не чуваць пра іх нічога... Адкрываю ліст і чытаю:

"Выпіска з пратаколу паседжаньня Рады Моладзі БНФ ад 19.08.2010 г.

Старшыня паседжаньня: Антон Каліноўскі.

Сакратар паседжаньня: Кацярына Коласава.

Прысутнічалі cябры Рады: Аляксандр Кузьняцоў, Каця Маркоўская, Сяржук Семянюк, Віталь Чарняўскі, Уладзімер Шульжыцкі, Каця Коласава, Антон Каліноўскі, Аляксандра Клімовіч.

Пункт парадку дня № 2. Аб выключэньні сп. Ф.Вячоркі, А. Крэчкі, А. Анісімава зь ліку сяброў Моладзі БНФ.

Выступіў: сябра Рэвізійнай камісіі Моладзі БНФ Алесь Каліта, які азнаёміў сябраў Рады Моладзі БНФ, з рашэньнем Рэвізійнай камісіі Моладзі БНФ № 1 ад 18.08.2010 г., якое рэкамэндавала Радзе Моладзі БНФ выключыць зь ліку сяброў Моладзі БНФ Ф. Вячорку, А. Анісімава, А. Крэчку за дзеяньні, якія ганьбяць гонар і годнасьць сябра Моладзі БНФ.

Прапанова аб выключэньні Ф.Вячоркі, А. Крэчкі, А. Анісімава зь ліку сяброў Моладзі БНФ пастаўлена на галасаваньне.

Галасавалі:
 

За: 7
 

Супраць: 1
 

Устрымалася: 0
 

Вырашылі: выключыць зь ліку сяброў Моладзі БНФ Ф.Вячорку, А. Крэчку, А. Анісімава зь ліку сяброў Моладзі БНФ"

- Спачатку думаў, што чарговы жарт. Аказалася - праўда. Паглядзеў на сьпіс удзельнікаў - 8 чалавек, у Радзе - 15. Кворум ёсьць. А было б на аднаго чалавека меней - рашэньне не прайшло б. Дэмакратыя, што зробіш. Афіцыйная фармулёўка такая самая, што і пры выключэньні з партыі: "за дзеяньні, якія ганьбяць гонар і годнасьць сябра Моладзі БНФ". Мяне зьдзівіла не рашэньне, а сакрэтнасьць, пры якім адбывалася паседжаньне. Нават у савецкія часы пытаньне аб выключэньні каго-кольвек адбывалася ў яго прысутнасьць.

Сумна назіраць, як спэцслужбы дабіваюць БНФ. Не, я зусім не лічу, што ўсе гэтыя людзі - агенты КДБ. Яны шчыра вераць у тое, што робяць добрую справу. Як і чальцы камісіяў, якія падстасоўваюць выбары. Як і салдаты тэрміновай службы, зьбіваючы дручкамі дэманстрантаў. Бог ім судзьдзя.

Але ж як усё складваецца! Сёньня гадавіна Жнівеньскага путчу. 19 год таму адбылося нешта падобнае. Група зацятых абаронцаў СССР абвясьцілі сябе адзіным легальным кіраўніцтвам, увялі танкі, цэнзуру. Пасьля іх дзеяньні назвалі дзяржаўным пераваротам.